୧୩୫୦ ଟଙ୍କା ଦେଇ ଆଶା ବଢ଼ାଇ ୪ଲକ୍ଷ ୪୦ ହଜାର ଟଙ୍କା ନେଇଗଲା ସାଇବର ଠକ
ବ୍ରହ୍ମପୁର,୧୫/୧୧/୨୩: ପୁଲିସ ସଚେତନ ବାରମ୍ବାର କରାଇଲେ ମଧ୍ୟ ଲୋକେ ସଚେତନ ହେଉନଥିବା ଦେଖୁବାକୁ ମିଳିଛି । ପୁଲିସ ସାଇବର ଠକରୁ ବର୍ତ୍ତିବା ପାଇଁ ବିଭିନ୍ନ ସ୍କୁଲ, କଲେଜ, ଛକ ଓ ବିଭିନ୍ନ ସଭା ଆୟୋଜନ କରି ସଚେତନ କରିଥିଲା ।ତଥାପି ଲୋକେ ସେହି ଭୁଲ ହିଁ କରୁଛନ୍ତି । ଗଞ୍ଜାମ ଜିଲ୍ଲା ଦିଗପହଣ୍ଡି ଅଞ୍ଚଳର ଜଣେ ଯୁବତୀ ସାଇବର ଠକର ଶିକାର ହୋଇ ୪ଲକ୍ଷ ୪୦ହଜାର ଟଙ୍କା ହରାଇଛନ୍ତି । ଇନଷ୍ଟାଗ୍ରାମ ପୋଷ୍ଟକୁ ଲାଇକ ଓ ସେୟାର କରିବା ଭଳି ପାର୍ଟ ଟାଇମ ଜବ ଲୋଭରେ ପଡି ଯୁବତୀ ଜଣଙ୍କ ଏଭଳି ଠକେଇର ଶିକାର ହୋଇଥିବା ନେଇ ବ୍ରହ୍ମପୁର ସ୍ଥିତ ସାଇବର ଏବଂ ଅର୍ଥନୈତିକ ଅପରାଧ ଥାନାରେ ଅଭିଯୋଗ ହୋଇଛି ।ଅଭିଯୋଗକୁ ଆଧାର କରି ପୁଲିସ ୨୫/୨୩ରେ ଏକ ମାମଲା ରୁଜୁ କରି ଘଟଣାର ତଦନ୍ତ କରୁଥିବା ଜଣାପଡିଛି । ଦୀର୍ଘଦିନ ଧରି ଏହି ଥାନାରେ ମୁରବୀ ପଦ ଖାଲି ପଡିଥିବା ବେଳେ ଗତ ଏକ ସପ୍ତାହ ପୁର୍ବେ ଇନ୍ସପେକ୍ଟର ଭେଲେଣ୍ଟାନା ରାୟଙ୍କୁ ଏହି ଥାନାର ଦାଇତ୍ୱ ଦିଆଯାଇଛି ।ସେ ଦାଇତ୍ୱ ନେବା ପରେ ଏହା ପ୍ରଥମ ଠକେଇ ମାମଲା ବୋଲି ଜଣାପଡିଛି । ଏହା ତାଙ୍କର ପ୍ରଥମ ଠକେଇ ମାମଲା ହୋଇଥିବାରୁ ସେ ଗୁରୁତର ସହ ଅଭିଯୋଗ ଗ୍ରହଣ କରି ତଦନ୍ତ ଜୋରଦାର କରୁଥିବା ଜଣାପଡିଛି । ଅଭିଯୋଗମୁତାବକ,ଦିଗପହଣ୍ଡି ଥାନା ଅନ୍ତର୍ଗତ ବାସୁଦେବପୁର ଅଞ୍ଚଳର ଏମ.ବନିତା(ଛଦ୍ମ ନାମ ୩୦)ନାମକ ଜଣେ ଯୁବତୀଙ୍କ ନିକଟକୁ ଗତ ୮ତାରିଖରେ ଟେଲିଗ୍ରାମରେ ଏକ ମେସେଜ ଆସିଥିଲା ।ଇନଷ୍ଟାଗ୍ରାମ ଚେନାଲର ପୋଷ୍ଟ ଏବଂ ଭିଡିଓକୁ ଲାଇକ କଲେ ଟଙ୍କା ମିଳିବ ବୋଲି ସେହି ମେସେଜରେ ଉଲ୍ଲେଖ ରହିଥିବା ଅଭିଯୋଗରେ କୁହାଯାଇଛି । ସେହିକ୍ରମରେ ବନିତା ଏକ ଟେଲିଗ୍ରାମ ଗୃପରେ ଜଏନ କରି ପ୍ରଥମେ ୩ଟି ପୋଷ୍ଟକୁ ଲାଇକ କଲେ । ଏଥିପାଇଁ ତାଙ୍କୁ ୧୫୦ ଟଙ୍କା ମିଳିବ ବୋଲି କୁହାଯାଇଥିଲା । ଏହି ୩ ଟି ପୋଷ୍ଟକୁ ଲାଇକ କରି ସାରିବା ପରେ ଗୃପର ମ୍ୟାନେଜର ତଥା ସତ୍ୟ ନାମକ ଜଣେ ବ୍ୟକ୍ତିଙ୍କୁ ଯୋଗାଯୋଗ କରିବାକୁ କୁହାଯାଇଥିଲା । ଯୁବତୀ ଜଣଙ୍କ ସତ୍ୟଙ୍କୁ ଟେଲିଗ୍ରାମରେ ଯୋଗାଯୋଗ କରିବା ପରେ ଟଙ୍କା ଉଠାଣ ପାର୍ଇ ଏକ କୋଡ ଦରକାର ଯାହା ମାରିନା ଗୁପ୍ତା ନାମକ ଜଣେ ମହିଳା ରିସେପନିଷ୍ଟ ଯୋଗାଇଦେବେ ବୋଲି ସତ୍ୟ କହିଥିଲେ । ମାରିନା ଗୁପ୍ତା ସହ ଯୋଗାଯୋଗ ପପରେ ଟଙ୍କା ପଠାଇବା ପାଇଁ ସେ ବନିତାଙ୍କ ବ୍ୟାଙ୍କ ଆକାଉଣ୍ଟର ବିବରଣୀ ମାଗିଥିଲେ । ବନିତା ବ୍ୟାଙ୍କ ଆକାଉଣ୍ଟ ଦେବା ପରେ ରିସେପନିଷ୍ଟ ମହିଳା ଜଣଙ୍କ ଆଉ ଏକ ଟେଲିଗ୍ରାମ ଚେନାଲରେ ଯୋଡି ହେବାକୁ କହିଥିଲେ । ଏହାପରେ ବନିତାଙ୍କ ଆକାଉଣ୍ଟକୁ ୧୫୦ ଟଙ୍କା ଆସିଥିଲା । ଏହାପରେ ବନିତାଙ୍କୁ ୧୮ଟି କାମ ଦିଆଯାଇଥିଲା । ଆଉ ଏକ ଲିଙ୍କକୁ କ୍ଲିକ କରି ୧୦୦୦ ଟଙ୍କା ଡିପୋଜିଟ କଲେ ୧୩୫୦ ଟଙ୍କା ମିଳିବ ବୋଲି କୁହାଯାଇଥିଲା । ଏହିକ୍ରମେ ବନିତା ୧୦୦୦ ଟଙ୍କା ଜମା କରିବାର କିଛି ସମୟ ପରେ ତାଙ୍କ ଆକାଉଣ୍ଟକୁ ୧୩୫୦ ଟଙ୍କା ଆସିଥିଲା । ଏହାପରେ ୮ ହଜାର ଡିପୋଜିଟ କଲେ ୧୦ ହଜାର ମିଳିବ ବୋଲି କୁହାଯାଇଥିଲା । ତା’ ପର ଦିନ ବନିତା ୨ଟି ପର୍ଯ୍ୟାୟରେ ୧୦ ହଜାର ଓ ୩୦ ହଜାର ଡିପୋଜିଟ କରିଥିଲେ । ଅଧିକ ଟଙ୍କା ପାଇବା ଲୋଭରେ ଗୋଟିଏ ଦିନ ପରେ ୧ ଲକ୍ଷ ଏବଂ ୩ ଲକ୍ଷ ଟଙ୍କା ଡିପୋଜିଟ କରି ଦେଇଥିଲେ । ହେଲେ ସେପଟୁ ଆଉ ବୋନାସ କିମ୍ବା ମୁଳ ଟଙ୍କା ଫେରି ପାଇନଥିଲା । ଏ ନେଇ ସେ ଗୃପର ମ୍ୟାଜେରଙ୍କୁ ଯୋଗାଯୋଗ କରିବା ପରେ ଆଉ ଅଧିକ ଟଙ୍କା ଡିପୋଜିଟ କରିବାକୁ କୁହାଯାଇଥିଲା । ମୋଟ ୪ ଲକ୍ଷ ୪୦ ହଜାର ଟଙ୍କା ଦେଇ ସାରିବା ପରେ ବନିତା ସାଇବର ଠକେଇର ଶିକାର ହୋଇଥିବା ଜାଣିବାକୁ ପାଇଥିଲେ ।ପରେ ଘଟଣାକୁ ନେଇ ସାଇବର ଥାନାରେ ଅଭିଯୋଗ କରିଥିଲେ ।
ରିପୋର୍ଟ: ଆର. ଅନିଲ ରେଡ୍ଡୀ
