ଗୋପାଳପୁର,୧୫/୪/୨୪:ଗୋପାଳପୁର ବିଚରେ ପାର୍କିଂ ଫିସ ବାବଦକୁ ଆବଶ୍ୟକତା ଠାରୁ ଅଧିକ ଟଙ୍କା ଆଦାୟ ହେଉଛି । ଗୋପାଳପୁର ଏନଏସି ପକ୍ଷରୁ ଗାଡି ପିଛା ଯେତିକି ଟଙ୍କା ଧର୍ଯ୍ୟ କରାଯାଇଛି ଗୁତାଦାର ଜଣଙ୍କ ବେଆଇନ ଭାବେ ତାଠାରୁ ଅଧିକ ଟଙ୍କା ଜୋର୍ ଜବରଦସ୍ତ ଆଦାୟ କରୁଛନ୍ତି । କେବଳ ସେତିକି ନୁହଁ ଏଠାରେ ମୁଁହ ଦେଖା କାରବାର ମଧ୍ୟ ଚାଲିଛି । ଚିହ୍ନା ପରିଚିତ ଲୋକଙ୍କ ଗାଡି କୁ ଭିତରକୁ ଛଡା ଯାଉଥିବା ବେଳେ ଅଚିହ୍ନା ଲୋକଙ୍କୁ ବିଚ୍ ଠାରୁ ବହୁ ଦୂରରେ ଅଟକାଇ ଦିଆ ଯାଇଛି । ମାତ୍ରାଧିକ ପାର୍କିଂ ଫିସ ଆଦାୟକୁ ନେଇ ପର୍ଯ୍ୟଟକଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖିବାକୁ ମିଳିଛି । ପ୍ରତ୍ୟେକ କାର ପିଛା ୪୦ ଟଙ୍କା ଆଦାୟ ପାଇଁ ଏନଏସି ପକ୍ଷରୁ ଦର ଧାର୍ଯ୍ୟ କରାଯାଇଛି । ହେଲେ ପାର୍କିଂ ଫିସ ଆଦାୟ ପାଇଁ ଟେଣ୍ଡର ପାଇଥିବା ବ୍ୟକ୍ତି ଜଣଙ୍କ କାର ପିଛା ୫୦ ଟଙ୍କା ଲେଖାଏଁ ଆଦାୟ କରୁଛନ୍ତି । ଏପରିକି ଫିସ ଆଦାୟ ବାବଦକୁ ଯେଉଁ ରସିଦ ଦେଉଛନ୍ତି ସେଥିରେ ମଧ୍ୟ ୫୦ ଟଙ୍କା ଲେଖା ହୋଇଛି । ଏନଏସି ର କାର୍ଯ୍ୟନିର୍ବାହୀ ଅଧିକାରୀଙ୍କ ଚିଠି ସଂଖ୍ୟା ୭୧୩ ପ୍ରକାରେ କାର ପିଛା ୪୦ ଟଙ୍କା ଏବଂ ଅଟୋ ପିଛା ୨୦ ଟଙ୍କା ଆଦାୟ କରାଯିବା କଥା । କିନ୍ତୁ ଗୁତାଦାର ଜଣକ ନିଜ ଇଚ୍ଛା ଅନୁସାରେ ପର୍ଯ୍ୟଟକଙ୍କ ଠାରୁ ଅଧିକ ୧୦ ଟଙ୍କା ଲେଖାଏଁ ଆଦାୟ କରୁଛନ୍ତି । ଆବଶ୍ୟକତା ଠାରୁ ଅଧିକ ପାର୍କିଂ ଫିସ ଆଦାୟ କରାଯାଉଥିବା ଜାଣିଥିଲେ ମଧ୍ୟ ଏନଏସି ପକ୍ଷରୁ କୌଣସି ପଦକ୍ଷେପ ନିଆ ଯାଉନାହିଁ । ଯଦି କୌଣସି ପର୍ଯ୍ୟଟକ ଏ ନେଇ ପ୍ରଶ୍ନ କରନ୍ତି ତା ହେଲେ ତାଙ୍କୁ ଦୁର୍ବ୍ୟବହାର କରାଯାଉଛି । ଏ ଦିଗରେ ଜିଲ୍ଲା ପ୍ରଶାସନ ତୁରନ୍ତ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି ।