ବ୍ରହ୍ମପୁର,୨୫/୧/୨୪:ସ୍ଥାନୀୟ ବ୍ରହ୍ମପୁର ବଡ଼ ମେଡ଼ିକାଲ ନିକଟରେ ଥିବା ଏସବିଆଇ ଏଟିଏମ ନିକଟରୁ ଜଣେ ବୃଦ୍ଧଙ୍କ ଟଙ୍କା ଚୋରି କରିବା ସହ ଆସାଧୁ ଉପାୟ ଅବଲମ୍ବନ କରି ଠକେଇ କରିବା ଅଭିଯୋଗରେ ବୈଦ୍ୟନାଥପୁର ଥାନା ପୁଲିସ ଜଣେ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି । ଗିରଫ ଅଭିଯୁକ୍ତ ଜଣକ ହେଲେ ନିମଖଣ୍ଡି ଥାନା ଅନ୍ତର୍ଗତ ଲୋଚାପଡ଼ା ସ୍ଥିତ ଅଚିନ୍ତ୍ୟ ନଗରର ଶିସିକାନ୍ଥ ପାତ୍ର(୪୨) ।ପୁଲିସ ଅଭିଯୁକ୍ତଙ୍କ ନିକଟରୁ ନଗଦ ୪୦ ହଜାର ଟଙ୍କା ଓ ଗୋଟିଏ ବାଇକ ଜବତ କରିଛି । ସାଧାରଣଜନତାଙ୍କ ସହଯୋଗରେ ଅଭିଯୁକ୍ତକୁ ଗିରଫ କରିବାରେ ପୁଲିସକୁ ସଫଳତା ମିଳିଛି ବୋଲି ପୁଲିସ ପକ୍ଷରୁ କୁହାଯାଇଛି । ସୂଚନାଯୋଗ୍ୟ ଯେ, ସ୍ଥାନୀୟ ସିଦ୍ଧାର୍ଥ ନଗର ପ୍ରଥମ ଲାଇନ ନିବାସୀପ୍ରଫୁଲ୍ଲ କୁମାର ପାଢ଼ୀ (୬୮) ଗତ ନଭେମ୍ବର ୭ରେ ବଡ଼ ମେଡିକାଲ କ୍ୟାମ୍ପସ ନିକଟସ୍ଥ ଏଟିମ୍କୁ ଟଙ୍କା ଉଠାଇବାକୁ ଆସିଥିଲେ ।ଏଠାରେ ସେ ୨୦ହଜାର ଟଙ୍କା ଉଠାଇ ସାଥିରେ ଧରିଥିବା ପଲିଥିନ ବ୍ୟାଗରେ ଉକ୍ତ ଟଙ୍କା ସହ ଏଟିଏମ କାର୍ଡ,୩ଟି ପାସ ବୁକ, ପୋଷ୍ଟ ଅଫିସ ପାସ ବୁକ ,ମୋବାଇଲ ରଖିଥିଲେ । ସେ ଏଟିଏମ ବାହାରକୁ ଆସିବା ବେଳେ ଜଣେ ଦୁର୍ବୁତ୍ତ ଉକ୍ତ ବ୍ୟାଗକୁ ଛଡ଼ାଇ ନେବାରେ ସଫଳ ହୋଇଥିଲା । ପରେ ଦୁର୍ବୁତ୍ତ ଜଣକ ଏଟିଏମ କାର୍ଡରେ ପିନ ନଂ ଲେଖାଯାଇଥିବାରୁ ପିନ୍ ନମ୍ବର ଦୁରୁପଯୋଗ କରି ପୁଣି ୨୦ହଜାର ଟଙ୍କା ସେ ଏଚଡ଼ିଏଫସି ବ୍ୟାଙ୍କରୁ ଉଠାଇ ଥିଲେ । ଏ ନେଇ ବୈଦ୍ୟନାଥପୁର ଥାନାରେ ଅଭିଯୋଗ ହେବା ପରେ ପୁଲିସ ଏକ ମାମଲା ରୁଜୁ କରିଥିଲା । ଅଭିଯୁକ୍ତଙ୍କୁ ଧରିବା ପାଇଁ ଥାନା ଅଧିକାରୀ ବାବା ଶଙ୍କର ସରଫଙ୍କ ନେତୃତ୍ୱରେ ଏକ ଟିମ ଗଠନ ହୋଇଥିଲା ।ଏହି ଟିମ ଘଟଣା ସ୍ଥଳରୁ ସିସିଟିଭି ଫୁଟେଜ ସଂଗ୍ରହ କରି ବିଭିନ୍ନ ସ୍ଥାନରେ ଚଢ଼ାଉ କରିଥିଲା । ଦିର୍ଘ ଦିନ ପରେ ମଧ୍ୟ ଅଭିଯୁକ୍ତଙ୍କ ପରିଚିତ ଓ ଠିକଣା ପାଇପାରିନଥିଲା । ଶେଷରେ ପୁଲିସ ଘଟଣାସ୍ଥଳରୁ ମିଳିଥିବା ସିସିଟିଭି ଫୁଟେଜକୁ ସୋସିଆଲ ମିଡ଼ିଆରେ ଛାଡି ଅଭିଯୁକ୍ତକୁ ଚିହ୍ନଟ କରିବା ଲାଗି ଲୋକଙ୍କ ସହାୟତା ଲଢିଥିଲା । ସେହିକ୍ରମରେ ଜଣେ ବ୍ୟକ୍ତି କିଛିଦିନ ପୁର୍ବେ ଅଭିଯୁକ୍ତ ଜାଣିଥିବା ପୁଲିସକୁ କହିଥିଲା । ପରେ ପୁଲିସ ସେହି ବ୍ୟକ୍ତିଙ୍କ ତଥ୍ୟ ଅନୁସାରେ ପୁଲିସ ଅଭିଯୁକ୍ତ ଶିସିକାନ୍ଥଙ୍କ ଘରେ ଚଡ଼ାଉ କରି କାବୁଥିଲା । ଏହି ଘଟଣାରେ ପୁଲିସକୁ ବହୁତ ସାହାଯ୍ୟ କରୁଛନ୍ତି ସାଧାରଣ ଜନତା ।ତେଣୁ ସାଧାରଣଜନତାଙ୍କ ଏଭଳି ସହଯୋଗ ପାଇ ଅଭିଯୋଗକାରୀଙ୍କୁ ନ୍ୟାୟ ମିଳିପାରୁଛି ବୋଲି ପୁଲିସ କହିଛି । ଏହି ଟିମରେ ଏଏସଆଇ ବିଜୟ କୁମାର ସୁନାଶଗଡ଼ ,ହାବିଲଦାର ନାରାୟଣ ମହାପାତ୍ର , ଓଏପିଏଫ ଅଭିଯାନ ଗମାଙ୍ଗ ଓ ହୋମଗାର୍ଡ ଦୀପକ ପାତ୍ର ଥିଲେ । ବ୍ରହ୍ମପୁର ଏସପି ଉକ୍ତ ଟିମକୁ ପ୍ରସଂଶା କରିବା ସହ ଏଭଳି କାମ ଜାରି ରଖିବାକୁ ପରାମର୍ଶ ଦେଇଛନ୍ତି ।
