ଗୋଟିଏ ଖଣ୍ଡା, କାର,୩ଟି ମୋବାଇଲ ଓ ନଗଦ୪୫୪୦ଟଙ୍କା ଜବତ ବ୍ରହ୍ମପୁର,୨୫/୧/୨୪:ସ୍ଥାନୀୟ ହରୀପୁର ବ୍ରିଜ ନିକଟରେ ଜଣେ କଲେଜ ଛାତ୍ରକୁ ଅଟକାଇ ଖଣ୍ଡା ଦେଖାଇ ଟଙ୍କା ମାଗିବା ଘଟଣାରେ ଗୋପାଳପୁର ପୁଲିସ ଗୁରୁବାର ୩ଜଣ ଡକାୟତକୁ ଗିରଫ କରି କୋର୍ଟ ଚାଲାଣ କରିଛି । ଗିରଫ ଅଭିଯୁକ୍ତମାନେ ହେଲେ ବ୍ରହ୍ମପୁର ସଦର ଥାନା ଅନ୍ତର୍ଗତ ଲାଠି ଗ୍ରାମର ଦୁର୍ଦାନ୍ତ ଅପରାଧି ସୁନୀଲ ସେଠୀ, ସୁମନ କୁମାର ଗୌଡ, ଓ ଅନ୍ୟ ଜଣେ ଅଡବା ଥାନା ଅନ୍ତର୍ଗତ ଅନ୍ତରାବାସ ଗ୍ରାମର ସନ୍ତମାଳି ବୋଲି ବ୍ରହ୍ମପୁର ଏସପି ଡ଼ା ସର୍ବଣା ବିବେକ ଏମ ଏକ ପ୍ରେସବିବୃତି ମାଧ୍ୟମରେ ସୂଚନା ଦେଇଛନ୍ତି । ଅଭିଯୁକ୍ତମାନଙ୍କ ନିକଟରୁ ପୁଲିସ ଏକ କାର୍ , ଗୋଟିଏ ଖଣ୍ଡା, ୩ଟି ମୋବାଇଲ, ୪୫୪୦ ଟଙ୍କା ଜବତ ହୋଇଥିବା ଏସପି ସୂଚନା ଦେଇଛନ୍ତି । ସୂଚନାଯୋଗ୍ୟ ଯେ, କଳାହାଣ୍ଡି ଜିଲ୍ଲା ଭାବନୀପାଟଣା ନିବାସୀ ତଥା ବ୍ରହ୍ମପୁର ବୈଦ୍ୟନାଥପୁର ଥାନା ଅନ୍ତର୍ଗତ ହାତୀବନ୍ଧ ସାହିରେ ରହୁଥିବା କଲେଜ ଛାତ୍ର ଆରିୟନ ପଟ୍ଟନାୟକ ଓ ତାଙ୍କ ସହଯୋଗୀଙ୍କ ସହ  ଗତ ୨୪ତାରିଖ ସନ୍ଧ୍ୟାରେ ଗୋପାଳପୁର ବୁଲିବାକୁ ଯାଇଥିଲେ । ପରେ ସେମାନେ ହରୀପୁର ବିଚ ଯାଇଥିଲେ । ଏଠାରେ ଆରିୟନ ଓ ତାଙ୍କ ସହଯୋଗୀ ବୁଲାବୁଲି କରୁଥୁବା ସମୟରେ କିଛି ଦୁର୍ବୁତ୍ତ ସେମାନଙ୍କୁ ଲୁଟ୍ କରିବା ଉଦ୍ଦେଶ୍ୟରେ ଟାର୍ଗେଟ କରି ପିଛା କରିଥିଲେ । ହେଲେ ସ୍ଥାନୀୟ ହରିପୁର ବ୍ରିଜ ନିକଟରେ ସେହି ୩ଜଣ ଦୁର୍ବୁତ୍ତ ମାନେ ଏକ କାରରେ ଆସି ଖଣ୍ଡା ଦେଖାଇ ଆରିୟନଙ୍କୁ ଅଟକାଇ ଟଙ୍କା ମାଗିଥିଲେ । ଏଥିରେ ଭୟଭୀତ ହୋଇଯାଇଥିଲେ ଆରିୟନ । କୌଣସି ସୂତ୍ରରୁ ଖବର ପାଇ ଘଟଣା ସ୍ଥଳରେ ପୁଲିସ ଗାଡି ପହଞ୍ଚିବା ବେଳେ ଦୁର୍ବୁତ୍ତମାନେ ପୁଲିସ ଗାଡ଼ି ଦେଖି ଘଟଣା ସ୍ଥଳରୁ ଚମ୍ପଟ ମାରିଥିଲେ । ଏ ନେଇ ଆରୟାନ ପଟ୍ଟନାୟକ ଗୋପାଳପୁର ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗ ପ୍ରକାରେ ଏକ ମାମଲା ରୁଜୁ କରିଥିଲା । ତଦନ୍ତ ବେଳେ ପୁଲିସ ସିସିଟିଭି ଫୁଟେଜକୁ ଆଧାର କରି ଅଭିଯୁକ୍ତଙ୍କୁ ଚିହ୍ନଟ କରିଥିଲା ।ପରେ ସେମାନଙ୍କୁ ଗୋପାଳପୁର ଅଞ୍ଚଳରେ କାବୁ କରାଯାଇ ସେମାନଙ୍କ ନିକଟରୁ ଖଣ୍ଡା ,ମୋବାଇଲ ଓ ଟଙ୍କା ଜବତ ହୋଇଥିଲା ଗୁରୁବାର ସନ୍ଧ୍ୟାରେ ଉପରୋକ୍ତ ୩ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ବେଳେ ଅଭିଯୁକ୍ତ ସୁନିଲଙ୍କ ନାମରେ ପୂର୍ବରୁ ଏକାଧିକ ମାମଲା ରହିଥିବା ପୁଲିସ କହିଛି ।